今日番左去覆診，不過呢就見Ｄｒ.Ｊａｍｉｅ，順便睇埋眼仔問題，腸胃方面都ｏｋ，因為飲食都正常番，但係屎屎都係偏細粒，要小心留意住佢，而眼仔呢，滴顯影劑兩邊都塞，咁醫生同佢用綿花敷左陣眼睛，去左ｄ分泌物，咁因為ＣＣ個鹵水Ｐａｔ + 腳板底個餅毛毛 + 屁屁兩邊既毛團都幾厲害，而我平日又唔係幾幫佢清潔得到好乾淨，咁醫生呢就建議同佢做個美容清理毛毛啦，ｇｒｏｏｍｉｎｇ係每１５分鐘咁計，下面呢包毛團（見到佢腳板底餅毛麻），ｇｒｏｏｍ左３０分鐘…而家個屁屁好乾淨，腳底又冇晒死毛呢～

星期六個日朝早起身番工，餵菜同糧比ＣＣ時，發覺佢冇咩反應，對菜同糧都冇興趣，再比車厘子佢，只係哄一哄就走開，但都算精神，休息時會攤長身體，咁我就去番工先，叫媽咪再留意下佢啦，咁到左１１點到，佢都係唔多願食野，咁放工後就趕番屋企，用針筒餵佢飲左少少水，３點鐘就帶佢去大圍睇醫生，今次見既係 Ｄｒ.Ｍａｒｙ，醫生摸到佢個胃好漲，但腸就摸唔到有野塞住，建議我照張ｘｒａｙ，咁照左出來呢，見到個胃漲到好大啦，腸有ｄ屎屎係到，咁同佢吊左皮下水，打左２支針剌激胃腸臑動，仲有ｄ止痛葯同葯水番屋企食，咁發覺佢冇改善唔食野冇屎屎呢，就要立即番去再睇喇。

咁番到屋企，餵左好稀好稀既ｃ.ｃ.，再出去買左ｄ羅馬生菜、油墨菜，到夜晚呢，ＣＣ開始肯食幾口菜喇，都安心Ｄ，再夜ｄ１１點到，就開始有少少屎屎，雖然ｓｉｚｅ好細，但總算鬆一口氣

車厘子真係好好味呀～～

ＣＣ：食車厘子食到個咀仔紅卜卜，等我洗乾淨個咀仔先～

整左個紙皮盒比ＣＣ，佢哩左入去再伸個頭出黎食菜菜，好似隻蝸牛咁呢～

之前摸阿ＣＣ，見佢背背摸到骨，有ｄ驚佢會唔會瘦左ｄ呢？洗唔洗增肥呢？

咁去睇醫生順便問下呢，點知醫生話“哇，佢唔瘦呀，你抽下佢呢兩泡肉～佢都８歲喇，好似老人家咁ｄ肌肉鬆弛左，所以摸佢背背好骨，但佢其實唔係瘦架～”

（－ｏ－）？

我，Ｏ左咀……

食左幾日葯同滴左幾日葯水，ＣＣ隻眼仔精伶左，起碼都睜得大，而且都冇乜分泌物流出黎，不過揭起眼皮仍然見到腫左同好似有一粒小瘡瘡咁凸左出黎，但點都叫有好轉到都放心ｄ，但ＣＣ依家好叻喇，一見到我係房行出黎，第一時間哩埋，唔比我滴眼葯水，曳曳呀～

尋晚放工番屋企，發覺ＣＣ變左獨眼兔，左眼完全睜唔開，周圍既毛都槳住晒，試下用暖水同佢抹，即刻拎頭彈開…不過到今朝就見佢可以睜番開少少眼，見到一條黑色線咁…

等大圍開門就打去約醫生，睇佢既應該係Dr. Jamie，醫生係佢隻眼仔拎左一條疑似菜加草混合體唔知係咩既東東，唔知關唔關事整親隻眼，仲有做了螢光劑測試，眼角膜有好大既範圍損左，醫生話係唔正常既，而且發炎發得好厲害眼好腫，睇過牙仔，又好奇怪佢係左眼有事，但反而左邊既牙係生得靚過右邊，右邊就有少少歪左喇，不過都唔排除係因為牙既問題而導致眼睛發炎，咁暫時每日要食抗生素同滴眼葯水，如果幾日情況冇好轉，就要番去覆診，睇下需唔需要照ｘｒａｙ睇下係咪因為牙仔問題，如果有改善，就可以大概一星期後先番去覆診，醫生又話兔仔既眼角膜比較特別，復原時間較長，所以都會好得慢ｄ…

希望唔關牙仔事啦，今日ＣＣ又有新朵喇，今次唔係CrazyC，係忟憎豬呀～因為睇症既其間佢好忟憎發晒脾氣要逃走，姑娘係要攬住佢再用個身加埋塊面壓落去先按得住佢，冇比佢走甩呢～